Оконешников Семен Иванович

Эһээбит Оконешников Семен Иванович суруйан хаалларбыт ахтыыта:
Мин 1941 сыллаахха атырдьах ыйын 14 күнүгэр армияҕа ыҥырыллан Майаҕа барбытым. Майаттан Аллараа Бэстээххэ дылы сатыы өрүс биэрэгэр киирбиппит. Дьокуускайтан атырдьах ыйын 18 күнүгэр “Сталин” диэн грузовой пароходунан үс баржаны соһон, өрүс баһыгар 18 суукка айаннаан тиийбиппит. Саха сирин араас улуустарыттан сэриигэ ыҥырыллыбыт тыыһынчаттан тахса киһи балаҕан ыйыгар “Мальта” диэн станцияҕа тиийбиппит. Онно бастаан конюшня, остолобуой тутуутугар үлэлэппиттэрэ. 1942 сыллаахха “Мальта” станцияттан 90 бастыҥ саллааттары талан дьэ фроҥҥа ыыттылар. Алта суукканан Москва куоракка тиийбиппит. Миигин уонна өссө биир киһини “Катюша” диэн минометнай чааска анаатылар, онно үс ый үөрэттилэр. Онтон ыам ыйыгар арҕаа Калининскай уобаласка аҕыс “Катюша” массыынаны биэрэн уоттаах сэриигэ ыыппыттара. Новгород, Псков, Белгород, Лонна диэн куораттарынан сэриилэстибит. “Катюша” саамай ырааҕа аҕыс килэмиэтир сиргэ диэри ытара, мин онно расчетка сылдьыбытым. Өстөөхтөр диэки ытан баран куотан биэрэбит, турбут сирбитигэр дьэ ытан куһуйаллар. Онтон 1943 сыллаахха Москва куоракка төптөрү чааспытын толоруна кэлбиппит, дьоммут аҕыйааннар. Онно сылдьан мин испинэн ыалдьан госпитальга сыппытым. Бастакы Московскай военнай госпиталь диэҥҥэ, онно түөрт ый эмтэммитим кэннэ дойдубар ыыппыттара. Дойдубар атырдьах ыйыгар кэлбитим. Ол кэлэн баран 1944 сыллаахха бэс ыйыгар иккиһин ыҥырыллан Япония сэриитигэр барбытым. Онно Чита куоракка мас үлэтигэр, ыскылаат харабылыгар сылдьыбытым. 1945 сыллаахха ахсынньы ыйга дойдубар этэҥҥэ төннөн кэлбитим. Онтон ыла төрөөбүт дойдум чэчирии сайдарын туһугар күүһүм кыайарынан колхозка, онтон совхозка үлэлээбитим. Билигин пенсияҕа тахсан олоробун, сайынын совхозка оттуубун. 1975 сыллаахха Мэҥэ-Хаҥаластан 30 киһи буолан ветераннар, кыайыы 30 сылынан Волгоград, Саратов, Пенза, Москва куораттарынан күүлэйдии бара сылдьыбыппыт. Мин сэриилэспит чааһым 9 дивизия 39-с минометнай кыһыл знамялаах гвардейскай полк – диэн этэ.
Суруйдум Аҕа дойду улуу сэриитин кыттыылааҕа ветеран Оконешников Семен Иванович. 09.04.1985 сыл. Кыайыы 40 сыла. Наҕараадалара:
⁃ Сталин мэтээлэ
⁃ Кыайыы юбилейнай мэтээллэрэ
⁃ Жуков мэтээлэ
⁃ II степеннаах Аҕа дойду сэриитин ордена
Подразделение где служил, воспоминания и биография.

Распечатать