Сергучёв Федот Петрович

Сергучев Федот Петрович олунньу 13 күнүгэр 1916 сыллаахха Мэңэ-Хаңалас оройуонун I Баатара нэһилиэгэр төрөөбүтэ.
1930 сыллаахха 14 саастааҕар артыаллар тэриллибиттэригэр үлэлээн барбыта. Оскуолаҕа үөрэммэтэҕэ, кэлин ликбезка үөрэнэн ааҕар, суруйар буолбута.
«Түмсүү» колхозка хонуу үлэтигэр, сүөһүгэ от тиэйиитигэр, араас үлэлэргэ үлэлээбитэ. Кураан дьылларга колхоз сүөһүтүн Арҕаа Хаңаласка үүрэн илдьэн кыстатыы үгүс түбүктээх үлэтигэр үлэлээбитэ.
1941 сыллаахха от ыйыгар Куукунаттан армияҕа ыңырыллан барбыта. Онно 90-с отделение водоснабжение ротатыгар түбэһэн гидросаперынан 1946 сылга диэри сылдьыбыта. 1945 сыллаахха Забайкальскай фроңңа Япония империалистарын утары сэриигэ кыттыбыта. 1946 сыл ыам ыйыгар демобилизацияланан, бэс ыйыгар дойдутугар төннөн кэлбитэ уонна колхозка үлэлээн барбыта.
Эһээбит Федот Петрович 1948 сыллаахха биһиги эбээбитин Заровняева Евдокия Ивановнаны кытта холбоһон ыал буолбуттара. 6 оҕолоохтор, элбэх сиэттэр, хос сиэттэр кини олоҕун салгыыллар.
Федот Петрович 1984 сыллаахха ыалдьан өлбүтэ.
Наҕараадалара:
1. Медаль «За Победу над Японией», 1946г.
2. Медаль «За Победу над Германией»
3. Знак «25 лет Победы в Великой Отечественной Войне», 1970г.
4. Юбилейный медаль «Тридцать лет Победы в Великой Отечественной Войне 1941-1945 гг», 1975г.
5. Медаль «Ветеран труда», 1977г.
6. Юбилейный медаль «60 лет Вооруженных сил СССР», 1978г.
Уонна элбэх грамоталар, махтал суруктар кини килбиэннээх үлэтин туоһулууллар.

Распечатать