Макаров Сергей Кириллович (1895 – 1945) – Кыадаҥда нэһилиэгэр “Атах” диэн сиргэ төрөөбүт, баартыйата да, үөрэҕэ да суох, “1Маай” колхоз чилиэнэ, армияҕа 1943 сыл бэс ыйын 12 күнүгэр ыҥырыллыбыт. Сергей Кириллович сэриигэ барыан иннинэ колхозка араас үлэҕэ сылдьыбыт. Кини сэриигэ тылланан, сааһын көҕүрэтэн туран барбытын Кыадаҥда кырдьаҕастара Захар Томскай, Алексей Захарович Томскай кэпсииллэр эбит. “Сэнээн армияҕа ылбатахтарына куһаҕан буолуо”, – дии турарын академик К.С.Чиряев суруйбута баар. Сергей Кириллович баҕа санаата: “Уолбун Макаары кытта бииргэ сылдьан сэриилэһиэм”, – диэн эбит. Кини ол баҕа санаата туолбатаҕа, Чита куоракка бэлэмниир үөрэххэ сылдьан алтынньы 3 күнүгэр 1944 сыллаахха ыалдьан өлбүт, Чита куорат кылабыыһатыгар көмүллэн сытар. “Төһөлөөх элбэх аҕалар уолаттарын сэрииттэн кэтэспиттэрэ буолуой? Оттон бу сырыыга байыас уол аҕатын сэриигэ сүтэрбитэ”, – диэн Бүлүү биллиилээх кыраайы үөрэтээччитэ Егор Макарович Никифоров суруйан турар.
Сергей Кириллович Макаров аатын баһаам элбэх ыччаттара салгыыллар, эһэлэрин аатын үйэтитэллэр.

Макаров Сергей Кириллович
Нашли ошибку? Просим написать нам: nvk-online@mail.ru с указанием ссылки.