Томскай Алексей Захарович

Томскай Алексей Захарович (1919 – 2001) – кулун тутар 7 күнүгэр 1919 сыллаахха Кыадаҥда нэһилиэгэр Халгыйга төрөөбүт. Халбаакыга учууталлыы сылдьан 1942 сыл бэс ыйыгар сэриигэ ыҥырыллыбыт. Воронежскай фроҥҥа 142-с пулеметнай артиллерийскай полкаҕа 152 мм пушка хамандыырынан, онтон 3-с Украинскай фроҥҥа 100-с ГВ СД 102-с туспа зенитнай дивизионугар зенитнай-артиллерийскай взвод хамандыырынан сэриилэспит. Сэриини 1946 сыллаахха старшай лейтенант званиелаах, Кыһыл Сулус, Аҕа дойду сэриитэ l степенэ уордьаннаах, “Венаны босхолооһун иһин”, “Германияны кыайыы иһин” бойобуой мэтээллэрдээх түмүктээбитэ. Эйэлээх олоххо учууталлыырын саҕалаабыта, “Килбиэннээх үлэтин иһин” мэтээлинэн наҕараадаламмыта, СР культуратын үтүөлээх үлэһитэ, 2001 сыллаахха дойдутугар Кыадаҥдаҕа олорон өлбүтэ. Ахтыыттан быһа тардыы:”1945 сыл кулун тутар 4 күнүттэн Венгрияҕа Будапешт куораты босхолооһуҥҥа кыттыбытым. Муус устар 6-7 күннэригэр Вена иһин киирсии саҕаламмыта. Манна биһиги дивизиябыт чаастарын “мессершмит” сөмөлүөттэр атаакалаабыттара. Биһиги балары икки-үс килэмиэтир ыраах сиртэн икки буусканан ытыалаан биирин суулларбыппыт. Венаны босхолоон баран, Чехословакия сиригэр киирбиппит. Ыам ыйын 9 күнүгэр түүн икки чааска Нетолице куорат кытыытыгартурдахпытына фашистыы Германия капитуляциялаата диэн биллэрбиттэрэ. Оо, онно хайлахтаах үөрүү буолбутай! Алексей Захарович олорбут олоҕун оҕолоро, сиэннэрэ салгыыллар..

Распечатать