Волков Николай Николаевич

Николай Николаевич 1918 сыллаахха Бүлүү оройуонугар Дьооху диэн Кыргыдайтан 5 көстөөх сиргэ төрөөбүтэ. Свердлов колхоз олохтооҕо. Мастаах сэттэ кылаастаах (билигин Советскай Союз Геройа Алексей Миронов аатынан) оскуолатын бүтэрэн, Бүлүү педучилищетыгар үөрэммитэ. Училищены бүтэрэр сылыгар Аҕа дойду сэриитэ саҕаланан, харчы төлөөн үөрэнэр буолбуттара, ону кыайан төлөөбөккө,1941-1942 сс. дойдутугар тахсан учууталлаабыта. 1942 сыллаахха бэс ыйын 27 күнүгэр Кыһыл Армияҕа ыҥырыллан барбыта. Артиллерийскай чааска сибээскэ сулууспалаабыта. Сталинградскай фроҥҥа, Курскай тоҕойго, Днепри туорааһыҥҥа хорсуннук кыргыспыта. Днепр өрүһү туораан баран, ыараханнык бааһыран госпиталга киирбитэ. 1944 сыллаахха муус устар 28 күнүгэр өлбүтэ. Бииргэ төрөөбүт быраата Волков Николай Николаевич – Саха сирин, Россия үтүөлээх тренера маннык ахтар: « Ийэбит Марфа Васильевна Волкова кэргэнэ өлбүтүн кэннэ, алта оҕону атахтарыгар туруорбута, олортон Аҕа дойду сэриитигэр үс уола Ийэ дойдуларын көмүскээбиттэрэ. Убайым сэриигэ барарыгар мин тоҕус саастаах этим. Сэрииттэн элбэхтик суруйара, ийэбэр, дьоммор ааҕарым. Олортон одоҥ-додоҥ өйдөбүллэр хаалбыттар. Биирдэ “улахан кыайыыны ситистибит, онон дойдубар тиийэргэ эрэл баар» , атын суругар «Старай Оскол таһыгар кыргыһан, Белгороды босхолоотубут” диэбит этэ».
Кини көмүс уҥуоҕа Украина Кировоградскай уобалаьыгар Знаменка куоратыгар братскай могилаҕа көмүллүбүтэ. Онно быраата Николай Николаевич бара сылдьыбыта.

Распечатать