Птицына Александра Кононовна

Мин, тыыл, үлэ ветерана Птицына Александра Кононовна 1922 сыл ыам ыйын 15 күнүгэр төрөөбүтүм. Оскуолаҕа үөрэммэтэҕим, ликпууҥҥа үөрэнэн кыратык суруйар, ааҕар буолбутум. Сэрии иннинэ Ворошилов колхозка сайынын окко, кыһынын ыанньыксытынан үлэлээбитим. Сэрии саҕаламмытыгар эдэр дьону үлэҕэ диэн ааттаан колхозтартан хомуйан барбыттара. Онон 1942 сыл кулун тутарга Якутскайга Рыбтреска үлэҕэ кэлбитим. Үлэбит барыта куруус үлэтэ этэ. Сайынын борохуот таһаҕаһын куруустуурбут.
Онтон 1944 сыл Дьабарыкы Хайаҕа шахта үлэтигэр барбыппыт. Онно 10 ый үлэлээбиппит. Онтон төннөн кэлэн эмиэ Рыбтреспитигэр курууска үлэлээбиппит. Итиннэ 1950 сылга диэри сылдьыбыппыт. Ити курдук 1950 сыл дьэ трудовой фронтан көҥүллэммиппит. Мин хаалан Якутскайга кожкомбинакка иистэнньэҥ-мотористканан үлэлээн пенсияҕа тахсыбытым. Билигин Дьокуускайга олоробун. 1 оҕолоохпун, 3 сиэннээхпин, 1 хос сиэннээхпин. Онон дьоллоох ийэ, эбээ буолабын.
Оччотооҕу кэми санаатахха, ыарахан да кэмнэр кэлэн ааспыттар эбит. Хаарыаннаах эдэр уолаттарбыт сэриигэ баран умсубуттара. Сорохторо сэрии бааһын-үүтүн ылан кэлбиттэрэ. Биһиги тыыл үлэһиттэрэ үгүстүк аччыктаан, тоҥон эмиэ үгүс доҕотторбутун ыар ыарахан үлэҕэ сылдьан сүтэрбиппит. Оччотооҕу кэмҥэ биһиги биири саныырбыт-немеһи эрэ кыайыахха диэн. Төһө да ыараханын иһин бары үөрэ-көтө, ыллыы-туойа бэйэ-бэйэбитигэр көмөлөсүһэ сылдьарбыт.
Били²²и ыччаттарбар, оҕолорбор тугу баҕарыам этэй? Сэрии эрэ буолбатын! Дьол эрэ баар буоллун! Бары иллээх-эйэлээх буолуҥ диэн.

Распечатать