Раев Афанасий Петрович

Раев Афанасий Петрович (1922-1944) – 1922 сыллаахха Сыралта нэһилиэгэр Бахымахха төрөөбүт, комсомолец, ситэтэ суох орто үөрэхтээх. Бүлүү куоратыгар баһаарынай чааска сулууспалаабыт, армияҕа 1942 сыл бэс ыйын 17 күнүгэр ыҥырыллыбыт, I Украинскай фронт 1-кы ТА 11-с гв. тк 45-с гв. таанка биригээдэтигэр (ТБр) сэриилэһэ сылдьан ылбыт араанньытыттан 1944 сыл тохсунньу 18 күнүгэр 338-с СД 432-с МСБ сырдык тыына быстыбыт. Витебскай уобалас Лиозно оройуонун Погостище дэрибинэтин соҕуруулуу ойуур саҕатыгар көмүллүбүт, сэрии кэнниттэн бу бырааттыы көмүү дэриэбинэ иһигэр көһөрүллүбүт. Афанасий Петрович 1943 сыл бэс ыйыгар суруйбут иккис суруга Бүлүүгэ атырдьах ыйын 28 күнүгэр тиийэн кэлбит: “Ув. (көстүбэт) аан бастаан мин ааппыттан приветтэ тутуҥ! Мин сылдьабын үчүгэй, үөрэх кытаанах, зато ити үөрэх фашиһы үлтүрүтэргэ көмөлөөх буолуо. Мин эһиэхэ ыыттым 2,40 солк., икки мөһөөк 40 солк. Манна өллөхпүнэ таах баҕар хаалыа. Маны туттаххытына биир кило килиэп ылыаххыт. Өтөр биһиги решительнай охсуһууга киирэбит. Онон эрэбил суох. Ол да буоллар санааҕытын түһэримэҥ. Баҕар тыыннаах ордон хаалыам. Оччоҕо көрсүөхпүт. Онуоха дылы быраһаайдарыҥ. Суруйдум орто уолгут Афоня. Солдат (илии баттаабыт) А.Раев”. Саллаат бииргэ төрөөбүттэрэ 8- тар. Онтон бу ыалтан үс уолаттарын – Миитэрэйи, Михаилы, Афанасийы уоттаах сэриигэ атаарбыттара. Буойун Раев Афанасий Петрович, бэйэтиттэн төһө да оҕо хаалбатаҕын иһин, сиэн балтылара кини аатын үйэтитэллэр.

Распечатать