Томскай Егор Михайлович

Томскай Егор Михайлович (1907-1944) – 1907 сыллаахха Халгыйга Кыадаҥда нэһилиэгэр төрөөбүт, коммунист, кыра үөрэхтээх. Бүлүү райисполкомун инструктора, армияҕа 1942 сыл балаҕан ыйын 4 күнүгэр ыҥырыллыбыт. 1944 сыллаахха кулун тутар ыйга сураҕа суох сүппүт. Колхоз бэрэссэдээтэллэрин сэриигэ ыыппаттар этэ. Ону кытта сөпсөспөккө, Егор Михайлович тылланан туран сэриигэ барбыт. Хаһыс да туруорсуутун кэннитэн 1942 сыллаахха барбыт уонна сэрии толоонуттан эргиллибэтэх.
Уола Иннокентий Томскай ахтыыта: “Аҕам Егор Михайлович партия
Бүлүүтээҕи райкомун бюротун 1941 сыл балаҕан ыйын 26 күнүнээҕи уурааҕынан lll Күүлэккэ Крупская аатынан колхоз бырабылыанньатын бэрэссэдээтэлинэн үлэлээбитэ. 1942 сыл күһүнүгэр, армияҕа барар колхозтаахтарын атаарар аатыран, Бүлүүгэ киирэн фроҥҥа ыыталларыгар көрдөспүт. I Чочуттан киирэммит, аҕабытын кытта быраһаайдаспыппыт. Кинилиин бииргэ фроҥҥа барбытым диир партия чилиэнэ Егоров Тимофей Васильевич ахтыытын истиэҕин: “Кулун тутар 14 күнүгэр сарсыарда 9 чааска “Катюша” ытыалаатын кытта туорааһын саҕаламмыта. Мин илии пулемёта сүгэһэрдээҕим, Томскай Егор – 2000 ботуруон киирэр дискэни, оттон Чупчугур уола Ньукулай – пулемёт станогун сүкпүттэрэ. Ньукулайы ууга киирэ илигинэ бэйэтигэр иилинэ сылдьар гранататын, өстөөх буулдьата табан, эстэн өлөрбүтэ. Бүттэлээх хаалбатах этэ. Кини хайдах өлбүтүн Егор биһикки көрбүппүт. Төбөтө эрэ ордубут этэ. Бэргэһэтин устан сирэйин сабан биэрбитим. Онтон биһиги өрүһү туораан барбыппыт. Ортолоон баран эргиллэн көрбүтүм: Егорум суох этэ. Кинини өрүс уҥуор көрсүбэтэҕим. Өрүс уҥуор кыргыһыы буолбута. Ууга дьон туох да баһаам өлбүтэ…Ити кыргыһыы ынырык этэ.Киһи диэн, ат диэн, массыына алдьаммыта бөҕө. Ити барыта сырдыкка үчүгэйдик көстөрө. Икки хонон баран бааһырбытым”.
1966 сыл сайыныгар Бүлүү военкоматыгар сылдьыбытым, Т.В.Егоров кимин билээри. I Украинскай фронт 416-с стрелковай полкатыгар 1943 сыл ыам ыйын 28 күнүттэн стрелоктаабыт. 1944 сыл кулун тутарыгар бааһырбыт.
Тимофей Васильевич эппитэ: “Сахалар чугас-чугас утуйа сатыырбыт, дойдубутун
ахтарбыт”. Егор Михайлович Томскай олоҕун ыччаттара салгыыллар.

Распечатать