Фёдорова Матрёна Кирилловна

Күн күбэй ийэбит, тыыл бэтэрээнэ, Федорова Мотрена Кирилловна 1924 сыллаахха Сунтаар оройуонун Быйакыга (Кыһыл күүс) ” Чкалов” холкуоска төрөөбүтэ, аҕата Федоров Кирилл Спиридонович, ийэтэ Федорова Мария Алексеевна. Бииргэ төрөөбүтэрэ 5 эбиттэр. Улаханнара Федор, онтон биһиги ийэбит Мотрена, Спиридон, саамай кыралара Надежда. Сэрии саҕаланарыгар уон сэттэлээх, чороччу улаатан эрэр кыыс, ааҕар суруйар буолан ферма сэбиэдиссэйинэн үлэлиир. Кэлин “Чкалов” колхозка биригэдьииринэн үлэлээбит. Ийэлэрэ сэрии кэмигэр 1944с., кыра балта Надя 2 саастааҕар өлбүт. Онно ийэбит 22 саастаах эбит. Кыайыы кэнниттэн Генеров Игнатий Степановичка кэргэн тахсан 7 оҕоломмуттара. Ийэбит “Медаль материнства” – 1, 2, 3 степеннээх медаллардаах этэ уонна ” За Победу над Германией”. Биһиги ийэбит иискэ улахан дьоҕурдаах иистэнньэҥ буолан, дэриэбинэ дьонун наадыйар таҥаһын, мааны платьетыттан костюмугар, ону ааһан кыһыҥҥы дьахтар сонугар, бэргэһэтигэр уонна унтуутугар тиийэ тигэр буолара. Үлүгэрдээх интернат оҕотугар школьнай форма, телогрейка эҥин сакаастаан тиктэрэллэрэ. Сэттэ оҕотун иитээри- аһатаары түүннэри иистэнэр буолара… 1961с кэргэнэ суох буолбутун кэннэ оҕо уһуйааныгар иитээччи көмөлөһөөччүтүнэн, кэлин маҕаһыыҥҥа остуораһынан үтүө суобастаахтык үлэлээбитэ.

Распечатать