Мурунов Дмитрий Григорьевич

Мурунов Дмитрий Григорьевич (1904-1989). Таатта оройуонун Дьиэбэгэнэ нэһилиэгэр төрөөбүтэ.
Дьиэбэгэнэҕэ тэриллибит маҥнайгы «Дьоҕууһап күүһэ», онтон Сталин аатынан холкуостарга 1931-1938 сс. бэрэссэдээтэлинэн, 1944-1949 сс. биригэдьииринэн үлэлээбитэ. Кыһыл Армыйаҕа 15.07.1942 с. Чурапчы оройуонунааҕы холбоһуктаах военкоматынан ыҥырыллыбыта. Байыаннай-политическай бэлэмнэниини Мальта станцияҕа, онтон Москва аттыгар байыаннай лааҕырга барбыта, автоматчик буолбута. Сэрии кэмигэр II-с Украинскай фронт 223-с стрелковай полкатын 1-кы батальонун 2-с ротатыгар сулууспалаабыта. Харьков, Полтава куораттары босхолооһуҥҥа хорсуннук кыттыбыта. Хаан тохтуулаах кыргыһыы кэмигэр ыараханнык бааһырбыта, 5 ый госпитальга сытан эмтэнэн, 1944 с. 2-с группалаах инбэлиит буолан, дойдутугар эргиллибитэ. Сэрии кэнниттэн Сталин аатынан колхуоска биригэдьииринэн, «Таатта» сопхуоска рабочайынан үлэлээбитэ.
Хорсун быһыытын иһин наҕараадалара: Кыһыл Сулус, Аҕа Дойду Улуу сэриитин I степэннээх орденнара, «Германияны кыайыы иһин», Улуу Кыайыы үбүлүөйдээх сылларын мэтээллэрэ.
Саха Сирин народнай хаһаайыстыбатыгар сыралаах үлэтин иһин «Аҕа дойду сэриитин кэмигэр 1941-1945сс. килбиэннээх үлэ иһин» мэтээлинэн, ЯАССР Үрдүкү Сэбиэтин Президиумун грамотатынан наҕараадаламмыта.
Мурунов Дмитрий Григорьевич оҕолоро, сиэннэрэ, хос сиэннэрэ аҕаларынан, эһэлэринэн олус киэн тутталлар.

Распечатать