Олесов Иннокентий Иванович

Олесов Иннокентий Иванович Араҥас нэһилиэгэр 1898 с. дьадаҥы кэргэҥҥэ төрөөбүтэ. Оскуолаҕа үөрэммэтэҕэ, «Ааҕар балаҕаҥҥа» үөрэнэн, сахалыы ааҕара, суруйара. Сэбиэскэй былаас маҥнайгы сылларыгар общетвеннай олоххо актыыбынайдык кыттыбыта. Ол курдук нэһилиэк сэбиэтин депутатынан талыллан, сир түҥэтигэр, маҥнайгы «Чыбаада» диэн артыалы тэрийиигэ актыыбнайдык кыттан үлэлээбитэ. кэлин колхозтары бөдөҥсүтүүгэ, бөһүөлэктээһини тэрийиигэ бырааттарын: Олесов С.А., Олесов А.Н, Олесов П.Н., Олесов В.П. кытта бииргэ салайсан «Кыһыл сомоҕо» кэлин Ворошилов аатынан колхоһу тэрийсэн үлэлээбиттэрэ. Биир бастыҥ колхозтаах быһыытынан биллэрэ. Аҕа дойдуну көмүскүүр сэрии сылларыгар үлэ фронугар актыыбынайдык үлэлээбитэ. Ол курдук 3 кыра тулаайах оҕолорун кырдьаҕас эбэлэригэр хаалларан ыалга дьукаах олордон баран, ыраах Кэбээйи оройуонугар балык бултугар үлэлээбитэ. Онтон кэккэ сылларга түүлээхситинэн үлэлээбитэ. Кырдьар сааһыгар инвалид буолуор диэри үлэттэн илиитин араарбакка ыалдьа да сылдьан хас да сыл бөһүөлэгэр почта тарҕатыыга үлэлээбитэ. Сэрии кэминээҕи аас – туор олоҕо таайан атаҕынан ревматизмалаан босхон буолан тэллэххэ суорҕаҥҥа сытан, сордонон 1974 с. өлбүтэ.

Распечатать