Егоров Василий Егорович

Егоров Василий Егорович – 1912 сыллаахха олунньу 7 күнүгэр Кыадаҥда нэһилиэгэр төрөөбүт, 1941 сыл балаҕан ыйын 15 күнүгэр армияҕа барбыт, 343-с СП рядовой саллаата. 1945 сыл сэтинньи 15 күнүгэр демобилизацияламмыт. “Бойобуой үтүөлэрин иһин”, “Германияны кыайыы иһин” бойобуой мэтээллэрдээх дойдутугар эргиллэн кэлбит. Бүлүүгэ сибээс узелыгар оробуочайдаабыта, Бүлүүгэ олорон өлбүтэ. Саллаат Василий Егорович ахтыыта: “Мин, Егоров В.Е., 1912 с. Кыадаҥда нэһилиэгэр төрөөбүтүм. Онтон Бүлүү куоратыгар киирэн олохсуйбутум. Улахан дьоҥҥо ликбезка учууталлаабытым, онтон Сыралтаҕа ааҕар балаҕаҥҥа үлэлээбитим. 1940 сыл сберкасса харабылынан, онтон пороховой складка үлэлии сылдьан 1941 сыллаахха армияҕа барбытым. 1941 с. Читаҕа, онтон Дассаҥҥа, Хоронорга үөрэммитим. Манчжурияҕа үлэлии сылдьан испинэн ыалдьан Хоронорга госпитальга эмтэммитим. 1943 с. тохсунньу 13 күнүгэр фроҥҥа барбытым. Калининскай фроҥҥа сэриилэспитим. Сэтинньи 14 күнүгэр араанньы буолан Ленинградскай госпитальга эмтэммитим. Үтүөрэн баран Выборг куоракка караулга сылдьыбытым. Онтон сэтинньи 18 күнүгэр 1945 с. демобилизацияламмытым. Сэрииттэн кэлэн баран конюхтаабытым, билигин кочегардыыбын”. Василий Егорович Егоров олоҕун, оҕолоро сиэннэрэ үйэтитэллэр.

Распечатать