Колесов Иван Михайлович

Эһэм Иван Михайлович Колесов – Нуучча Уйбаан айма5ынан түѳлбэнэн олорон, бары бииргэ хаһаайыстыбаларын кѳрѳн олордохторуна, Аан дойду үрдүнэн сэрии сабардаабыта. 1941 сыллаахха бастакы хомуурга түбэһэн сэриигэ барбыта. Читинскэй байыаннай чааска үѳрэхтээһиӊӊэ түбэспитэ. Онно ѳр буолбакка, 1 Украинскай фроӊӊа ыыталлар. 1942 сылтан сэрии кутаатыгар сылдьыбыта. Ити сыл от ыйыгар Александровскай дэриэбинэ иһин улахан кыргыһыыга самолёт, танка кѳмѳтүнэн дэриэбинэни босхолууллар. Бииртэн биир кыргыһыыга уһаарыллан Белгород куоракка тиийбитэ. Эһэм Уйбаан артиллерийскай орудие5а наводчигынан сылдьыбыта , ити кыргыһыыга 160 киһилээх рота дьонуттан 30 киһи ордубута – эһэм ахтыытыттан. Хорсун быһыыларын иһин,кинилэр отделенияларыгар Сталин махтал суругун аа5ан иһитиннэрбиттэр. Белгород куораттан сэриилэһэн,аны Харьков куораты босхолооһуӊӊа кыттыбыта. Харьковтаа5ы кыргыһыыга эһэм улаханнык бааһырар. Бу кыргыһыыга улахан сүтүгү кѳрсүбүттэрэ: 300 тыһыынча киһи ѳлбүтэ, 300 тахса сэбиэскэй самолет урусхалламмыта, 800-кэ курдук танка умайбыта, 5 тыһыынчаттан тахса миномет уонна ыарахан сэрии сэбэ туһаттан тахсыбыта – эһэм ахтыытыттан. А5а дойду сэриитигэр Харьковтаа5ы кыргыһыы биир саамай улахан сүтүктээхтэрэ этэ. Госпитальтан тахсан баран Смоленскайдаа5ы улахан кыргыһыыга кытта сылдьан тѳбѳтүгэр улаханнык бааһырар. Ɵйѳ суох сытан хас эмэ ый эмтэнэн баран, байыаннай эмтиир комиссия кѳрүүтүнэн сыыйыллыбыта. Тѳбѳтүгэр ылбыт бааһа улахана бэрт буолан, бэс ыйыгар 1944 сыллаахха дойдутугар тѳннүбүтэ. Бойобуой саллаат дойдутугар тѳннѳн кэлээт, холкуос үтүмэн үлэтин салайбыта. Сэрииттэн тѳннѳн балтараа сыл буолбутун кэннэ кэргэнэ ѳлѳр. 1949 сыллаахха бэйэтин курдук сэрии огдооботунэбээбим Марфаны кэргэн ылар. Марфа бастакы кэргэниттэн Мотя уонна Катя диэн кыргыттардаа5а. Кэнники үс о5олоноллор. Эһэм салайар үлэ5э үлэлээн, 1962 сыллаахха пенсия5а тахсан баран совхоз кадровай булчутунан 1980 сыллаахха диэри үлэлиир. Хомойуох иһин, эһэм Уйбаан Кыайыы 35 сылын туолара а5ыйах ый хаалбытын кэннэ, 1980 сыллаахха 73 сааһыгар биһиги кэккэбититтэн туораабыта. Ол гынан баран, саха саллаата дьоллоох оло5у олорон ааста. Кини о5олорун, сиэннэрин кѳрбут дьоллоо5о.

Распечатать