Константинов Николай Иванович

Константинов Николай Иванович (1918 – 2000) – 1918 сыллаахха Сыралта Бахымаҕар төрөөбүт, нолуок агена, армияҕа 1942 сыл бэс ыйын 27 күнүгэр Бүлүү РБК ыҥырыллыбыт. Старшина, 142-с АП старшината, Курскайдааҕы кыргыһыы кыттыылааҕа. Араанньытынан 1944 сыллаахха демобилизацияламмыт. Аҕа дойду сэриитэ l уонна ll степеннэрэ уордьаннарын кавалера, “1941-1945 с.с. Аҕа дойду Улуу сэриитигэр килбиэннээх үлэтин иһин” мэтээлинэн наҕараадаламмыта, колхозтаах, совхоз рабочайа, биригэдьииринэн уһуннук үлэлээбитэ. 2000 сыллаахха Чочуна олорон өлбүтэ.
Николай Иванович ахтыытыттан: “Сэриигэ барарбар ийэм “Тоойуом, Ньукулай, сэрэнэ сылдьаар дуу, мин санаам тоҕо эрэ бөҕөх. Этэҥҥэ эргиллэр инигин. Кэлэргэр тиийэрим эрэ, суох эрэ”, – диэн баран сүүспүттэн сыллаан ылбыта. Онтон аҕыйах хонон баран өлөөхтөөбүт этэ. Чебаркуль куорака тиийэн араас идэҕэ үөрэммиппит. Фроҥҥа ити сыл ахсынньытыгар Воронеж куорат туһаайыытынан киирбиппит. Курскай тоҕойдооҕу кыргыһыыны ким умнуой?! 1943 сыл от ыйын 5 күнэ, олус куйаас күн этэ, ити күн икки өттүттэн алльархайдаах уот аһыллыбат дуо! Киһи дөйөр алдьархайа, уот кытыастан олорор. Ити иэдээҥҥэ төрдүө эрэ буолан хаалбыппыт, чааспыт хайа диэки барбытын билбэппит. Эмискэ биһигини автоматынан ытыалаатылар, уолум охтон түстэ, өллө. Соҕотох хааллым. Арай, көрдөхпүнэ иннибэр киһи барыҥныыр, куттанным. Хата дьолбор, мин курдук чааһын көрдүү сылдьар нуучча киһитэ эбит. Хутор кытыы дьиэтигэр тиийэн, соҕотох дьахтар олорорун буллубут. “Эһиги дьоҥҥут бэҕэһээ ааспыттара”, – диэтэ. Онтон тыын ылан баран, ыраах сири айаннаан, ойуурга киирэн чааспытын булан ыллыбыт. Оо, онно үөрбүппүн! Озерко диэн хутор иһин эмиэ уот сэрии, саҕаланар, снарядтар аттыбытыгар тоҕута ыстаннылар, онтон ханна да барбыппын билбэппин, биирдэ өйдөммүтүм түөһүм иһин уот салыырга, бүргэһинэн тэһитэ кэйэргэ дылы. Амырыын ыарыы. Аттыбар маҥан халааттаах сиэстэрэ турар, уу көрдөөн истим. Манна госпитальга аҕалбыттара үс хоммут үһү. Түөспэр хас да оскуолка хатаммыт, эпэрээссийэлээн баран 4 оскуолагы кыайан ылбатахтар. Ол билигин улаханнык эрэйдиир. Онон сэрии инбэлиитэ буолан, дойдубун булбутум”. Николай Иванович аатын оҕолоро, элбэх сиэннэрэ салгыыллар.

Распечатать