Макаров Макар Сергеевич

Макаров Макар Сергеевич (1917-2008) – Кыадаҥда нэһилиэгэр Атах диэн сиргэ төрөөбүт, сэриигэ барыан иннинэ райфинотделга инспектордаабыт, армияҕа 1941 сыл балаҕан ыйын 4 күнүгэр ыҥырыллыбыт. 110-с СД 1291-с СП рядовой саллаата, Москва иһин кыргыһыы кыттыылааҕа, 1946 сыллаахха демобилизацияламмыт. Албан Аат lll степенэ, Аҕа дойду сэриитин l степенэ уордьаннар кавалердара, элбэх мэтээллэрдээх дойдутугар эргиллибитэ. Бүлүүгэ олорон өлбүтэ. “Бастакы хомуурга хабыллан, балаҕан ыйын 4 күнүгэр Бүлүү куоратыттан “Диктотор” борохуокка олорон, Бүлүү өрүс сүнньүнээҕи түөрт оройуон талыы дьонун кытта армияҕа барбыта. Мальта станцияҕа минометнай чааска икки ыйтан ордук кэмҥэ үөрэппиттэр. Ахсынньы ый бүтүүтүгэр анал эшелонунан фроҥҥа атаарыллыбыттара. Арҕааҥҥы фроҥҥа 110-с стрелквай дивизия 1291-с стрелковай полкатыгар минометнай батальоҥҥа Макаров рядовой саллаатынан сулууспалаабыта. Биирдэ, штабтан кэлэн, элбэх сахалары талан ылан, снайпердар үөрэхтэригэр илдьэ барбыттара. Макар эмиэ үчүгэйдик ытара, доҕотторун кытта барсыан баҕарбыта. Ону батальон командира, М.А.Гербес тоҕо эрэ кинини бэйэтигэр связнойунан илдьэ хаалбыта. Онон Макаров Гербес бойобуой бирикээстэрин рота командирыгар кэмигэр тиэрдитэлиир буолбута. Оччолорго 28 панфиловецтар хорсун быһыылара дойду үрдүнэн дорҕоонноохтук иһиллибитэ. Макаардаах да хаалсыбатахтара. Сүүрбэччэ буолан сыттахтарына, бастаан сэттэ, онтон тоҕус таанка кэлбитин сорохторун уматалаан чугуталаабыттара. Рядовой саллаат Макаров үгүс ахсааннаах атаакаларга киирсэн, мэлдьи охсуһуу инники күөнүгэр сылдьыбыта. Ыараханнык бааһырбыта. Госпитальга эмтэнэн үтүөрэн, младшай командирдары бэлэмниир кууруска үөрэммитэ. Ити кэнниттэн сэрии былаһын тухары минометнай расчету салайбыта” – Е.Васильев “Сэрии уотугар” кинигэтиттэн. Кыайыыны Макар Макаров Беломорск куоракка көрсүбүтэ. 1946 сыллаахха демобилизацияланан кэлбитэ. Макар Сергеевич олорбут олоҕун элбэх ыччаттара салгыыллар.

Распечатать