Биһиги эбээбит Борисова (Стрекаловская) Елена Михайловна 1923 сыллаахха муус устар 15 күнүгэр Уус-Алдан оройуонун I Өспөх нэһилиэгин Эрбэһин бөһүөлэгэр бааһынай кэргэҥҥэ төрөөбүтэ. Аҕата Стрекаловскай Михаил Саввич рыбсобуокка балыксытынан, кэлин доруобуйата мөлтөөн почтальоннаабыта. Ийэтэ Стрекаловская Матрена Дмитриевна элбэх оҕолоох, дьиэтин-уотун көрөн олорбута.
Эбээбит Елена Михайловна эдэр сааһыттан холкуоска ыанньыксытынан үлэлээбитэ. 1945 сыллаахха Борисов Петр Семеновичтыын холбоспуттара. 4 кыыс, 4 уол оҕону төрөтөн, үтүө суобастаахтык дойдуларыгар Өнөргө олорбуттара. «Эйэ» фондатыгар биэнсийэлэриттэн харчы угаллара. Үтүө суобастаах үлэтин туоһутунан көтөх муҥунан махтал суруктардаах, элбэх бочуотунай грамоталардаах, Өнөр нэһилиэгин бочуоттаах кырдьаҕаһа, үлэ, тыыл бэтэрээнэ.Художественнай самодеятельноска ыллаан-туойан «Сыана бэтэрээнэ» аатын ылбыта. Уһун дьоллоох олоҕу олорон ааспыт туоһутунан, 2000 сыллаахха 55 сыл бииргэ олорбуттарын «кыһыл көмүс сыбаайбалара» буолар. Кинилэр оҕолоро билигин дьоһун-мааны ыал буолан, бэйэлэрэ эмиэ сиэннэнэн, үлэлии-хамсыы сылдьаллар. Эбээлээх эһээбит сырдык мөссүөннэрэ биһиги сүрэхпитигэр өрүү тыыннаахтар.
Борисова Елена Михайловна
РаспечататьНашли ошибку? Просим написать нам: nvk-online@mail.ru с указанием ссылки.