Петров Федор Иванович

Петров Федор Иванович (1912-1993) – l Чочу нэһилиэгэр төрөөбүтэ, Бүлүү педучилищетын бүтэрбитэ, армияҕа 1942 сыллаахха ыҥырыллыбыт, старшай сержант, Белорусскай фронт 192-с СД сулууспалаабыта. 1946 сыллаахха демобилизацияламмыт, Кыһыл Сулус, Албан аат lll степэнэ уордьаннар, “Хорсунун иһин” икки, “Бойобуой үтүөлэрин иһин”, “Германияны кыайыы иһин”, “Берлини ылыы иһтн” мэтээллэр хаһаайыннара. 1993 сыллаахха Нам Хамаҕаттатыгар олорон өлбүтэ. “Кыым” хаһыат Ф.Находкин ыстатыйатыттан: Аҕа дойдуну көмүскүүр Улуу сэриигэ отут саастааҕар, 1942 сыллаахха дойдутугар, Бүлүүгэ үлэлии сылдьан ыҥырыллыбыт Петров Фёдор Иванович Сталинградтааҕы, Могилёв туһаайыытынааҕы кырыктаах кыргыһыыларга быһаччы кыттыбыта. Польша сирин, киин столицатын Варшаваны босхолооһуҥҥа, уодаһыннаах өстөөҕү тус бэйэтин арҕаҕар – Берлиҥҥэ самнарыыга отделение командирын, взвод командирыгар көмөлөһөөччү быһыытынан сылдьыбыта. Барыта түөртэ, ол иһигэр биирдэ дөйүтүллэн, биирдэ кыргыһыы хонуутуттан тус бэйэтэ кыайан тахсыбаттык ыараханнык бааһырталаабыта. Оскуолка сиһин, самыытын, саннын бүттэтэ суох гына илдьи көппүт саллаатын, бааһырбыта суукка кэриҥэ буолбутун кэннэ, чааһын саллааттара булан госпитальга киллэрэн өрүһүйэн тураллар. 1945 сыл муус устар 18 күнүгэр фашистскай-гитлеровскай үөрдэр арҕахтарыгар чугаһаан туран, Коммунистическай партия кэккэтигэр киирбитэ. Дойдутугар эргиллэн баран өр кэм устатыгар Бүлүү, Нам оройуоннарыгар үлэлээбитэ”. Төрдүһүн Федор Иванович Рейхстакка тиийэрэ 50-ча миэтэрэ хаалбытын кэннэ муус устар 24 күнүгэр араанньы буолбута. Госпитальга эмтэнэн тахсыбытын кэннэ Берлиҥҥэ хаалларан сулууспалаппыттара. Эйэлээх олох иһин харса суох Берлиҥҥэ тиийэ сэриилэспит саллаат олоҕо ыччаттарыгар салҕанар.

Распечатать