Кириллин Петр Егорович

Подразделение где служил, воспоминания и биография.
Эһэм ахтыытыттан
Мин 1942 сыллаахха бэс ыйын 22 күнүгэр Армияҕа ыҥырыллыбытым. Сунтаарга киирэн хас да хонукка сытан баран айаннаабыппыт. Урал Молотовскай уобаласка тиийэн биир ый кэриҥэ капантиннаан баран, байыаннай чааска араарталаабыттара. Миигин 61 -с стрелковай полкаҕа иккис ротаҕа (17- с) армия анаабыттара. Онно үс суоллаах сэрии сэбин үөрэппиттэрэ: автоматчик, ручной пулеметчик, винтовкаҕа онтон да атын орудиеларга. Ол сылдьан ис тиибигэр ыалдьан 6 ыйга дойдубар уопускаҕа кэлэн 3 группалаах инбэлиит буолан сылдьыбытым. Онтон 9 ый буолан баран эмиэ иккиһин 1944 сылга саас ыҥырыллыбытым. Ол баран тас Монголияҕа сулууспалыы сылдьан 1 сыл байыаннай пекарняҕа пекарынан үлэлээбитим. Онтон Япония сэрииннэн киирбитигэр, онно бэйэм аналлаах чааспар холбоһон сэриигэ киирсэр буобутум. Айаннаан иһэн кыра-кыра станцияларга хас да төгүллээх быстах сэриилэргэ сылдьыбытым. Онтон киһи өйдөөн-санаан сылдьар курдук сэрии буолбута. Хинган хайатыгар көрсүһүүгэ буулдьа таҥаспын алдьата сыһан, сиирэ-халты көтөн ааспыта. Онтон массыынаҕа олорбум кэннэ эмиэ биир буулдьа уҥа өртүбүнэн ыйылаабыта. Хинган чайатын ортоку чыпчаалынан айаннаан мүччү түһээппитин кытта ытыалаан барбыттара. Онно биһиги сэриилэрбит эмиэ утарсан өр-өтөр гымматахпыт, сотору үөдэн-таһаа , буор буолбуппут. Икки өртүттэн өлүү -алдьаныы элбэх этэ. Онтон сэрии бүппүтүн кэннэ салгыы үөрэнэн баран бирикээс быһыытынан дойдубутугар 1947 сыллаахха олунньу 28 күнүгэр кэлбиппит. Колхозка үлэлээбитим, коммунистическай үлэ ударнигабын. Кэргэним Марфа Гаврильевна, оҕолордоохпут, үгүс сиэннээхпит. Мин ахтыыбын үүнэн иһэр көлүөнэ ахта-саныы сылдьалларыгар аныыбын.
Мин эһэм Кириллин Петр Егорович, Күүкэй бөһүөлэгиттэн хоту, Харыйа Маарга киириэх иннигэр баар кыра сыһыылаах , көлүччэ оҕолоох Умсан алааска 1922 сыллаахха төрөөбүт ийэтэ Быыйа Баһылай кыыһа Балбаара, аҕата Алаадьы уола Дьөгүөр диэннэр. Бииргэ төрөөбүттэр үһүөлэр Николай армияҕа баран сураҕа суох сүппүт. Шура Илья Саввиновка кэргэн тахсыбыт.
Наименование награды
Орден Отечественной войны 2 степени
Медаль “За победу над Японией”.

Распечатать