Филипп Петрович Захаров, Аҕа дойду улуу сэриитин кыттыылааҕа, сэрии бэтэрээнэ.
Кини 1915 сыллаахха балаҕан ыйын 22 күнүгэр I Наахара нэһилиэгин “Кубалаах” диэн алааһыгар, дьадаҥы дьиэ кэргэнигэр төрөөбүт. Бииргэ төрөөбүт бэһиэлэр. Үс уол, икки кыыс. Аҕалара оһолго түбэһэн өлөн, ийэлэрэ оҕолорун соҕотоҕун ииппитэ.
Филипп Петрович кыра эрдэҕиттэн үлэҕэ эриллибит буолан, ханнык да үлэттэн чаҕыйбат этэ. 18 саастааҕар “Ликбезка” улахан дьону үөрэппитэ. Бэйэтэ үс кылаас үөрэхтээҕэ. Сэрии буолуон иннинэ куоракка тутууга үлэлии сылдьыбыта.
Филипп Петрович 1942 сыллаахха ыам ыйын бүтүүтэ Сэбиэскэй Аармыйаҕа ыҥырыллыбыта. Бурятия сиригэр №770 байыаннай чааска үөрэммитэ. 1943 сыллаахха алтынньы ыйга II Украинскай Фроҥҥа 333-с стрелковай полкаҕа сулууспалаабыт. Ровно диэн куораттан Дубно диэн сиргэ сэриилэспитэ. Учебнай сборга сылдьан баран, Курскай Тоҕой кыргыһыытыгар кыттыбыта. Дьэ, манна үрүҥ күн хараарар кыргыһыытыгар, роталарыттан үһүө эрэ буолан хаалаллар. Бүтэһик кыргыһыыларыгар төбөтүгэр улаханнык табыллар. Өлөр өлүүттэн табаарыһа уонна командира быыһаабыттар, санчааска аҕалбыттар. 40 хонук устата Ровно куоракка госпитальга өйө суох сыппыт. Онтон Гомель диэн куоракка көһөрбүттэр. Киевкэ 7 күн хоммут. Молотов диэн куоракка, онтон Москваҕа госпитальга сытан эмтэнэр. 1945 сыллаахха II-с группалаах инбэлиит буолан дойдутугар эргиллэр. Бу кыргыһыыларга, Ийэ дойдутугар муҥура суох бэриниилээҕин, хорсун санаалааҕын көрдөрөн “Хорсунун иһин” мэтээлинэн наҕараадаламмыт.
Үтүөрэн дойдутугар төннөрүгэр, командира, бэйэтин чаһытын бэлэхтээбит. Ол чаһыны, Филипп Петрович сүрдээҕин күндүтүк саныыра, кэриэстиирэ, харыстыыра, өлүөр диэри кэппитэ. Билигин оҕолоругар, сиэннэригэр, хос сиэннэригэр – “Командир бэлэх чаһыта” диэн үтүө өйдөбүл буола сылдьар.
1945 сыллаахха уоттаах сэрииттэн дойдутугар эргиллэн кэлээт Филипп Петрович үлэ үөһүгэр түспүтэ. Кыладыапсыгынан, биригэдьииринэн, “Байкалов” совхозка харчы түҥэтээччинэн (атынан таһара) чиэстээхтик үлэлээбитэ.
Кэргэнинээн Екатерина Семеновналыын 10 оҕолоохтор.
Распечатать