Исакова Парасковья Иннокентьевна

Күн күбэй ийэбит Исакова Парасковья Иннокентьевна 1928с тохсунньу 10 күнүгэр Мэҥэ – Хаҥалас оройуонун Хочо нэһилиэгэр Хатай диэн алааска күн сирин көрбүт . Бииргэ төрөөбүт 7 эбиттэр, онтон 4 оҕо сэрии иннинэ өлбүттэр . Хаалбыт 3 оҕо үс аҥы иитиллибиттэр . Аҕата сэрии иннинэ, ийэтэ 3 саастааҕар өлбүттэр . Онон тулаайах хаалбыт. Аҕатын кытта бииргэ төрөөбүт киһиэхэ, Исаков Илларион Иннокентьевичка иитиллибит . Кини 1941 с сэриигэ бастакы хомуурга барбыт уонна сэрииттэн эргиллибэтэх . Ол бириэмэҕэ ийэбит үһүс кылааска үөрэнэ сылдьыбыт . Сэрии буолан, кырыымчык олох кэлэн ийэбитин оскуолаттан уураппыттар . “Сэрии ыар олоҕун эппинэн – хааммынан билбитим…”- диэн ийэбит кэпсиир буолара . Ол сыл 30 борооскуну, эһиилигэр эмиэ 30 борооскуну көрбүт . Онтон 17 туҥуй тиҥэһэлэри туттарбыттар. Саас тиҥэһэлэрэ бары этэҥҥэ төрөөн, үчүгэй үлэтин иһин биир тиҥэһэнэн бириэмийэлээбиттэр . Чыамайыкы үрэҕэр “Таҥха” диэн сиргэ үс буолан 30-туу тиҥэһэни көрбүттэр . Онно ийэбит 16 саастаах эбит.
Сут дьылга Горнайга субан сүөһү көрүүтүгэр ыыппыттар . Төрдүө буолан 30 – туу сүөһүнү көрбүттэр . Сайынын “Күөх дулҕа” диэн сайылыкка сайылаабыттар . Дойдуларыгар кэлэн икки сыл тохтообокко кыһынын сүөһү көрүүтүгэр, сайынын окко үлэлээбит . От үлэтэ барыта илиинэн буолар эбит . Онтон икки сыл арыыһыттаабыт .190 сүөһү үүтүн соҕотоҕун түһэрэн, арыы таптайан оҥорор эбит . Сайынын, түүн сөрүүҥҥэ арыытын бөһүөлэккэ илдьэн, кыладыапсыкка туттарар эбит . Кыһынын салааскаҕа соһон илдьэн эмиэ туттарар эбит .
Кэнники Байкалов совхоз буолбутун кэннэ ыанньыксытынан 1950 – 1967сылга дылы тохтообокко үлэлээбит .
1952с Догдоҥо нэһилиэгиттэн төрүттээх Степанов Николай Николаевичтыын ыал буолбуттар . 1969 -1976с Манчаары отделениетын хонтуоратыгар тех. үлэһитинэн, 1976 – 1985с. диэри детсадка тех. үлэһитинэн үтүө суобастаахтык үлэлээбитэ.
Ийэбит “Медаль материнства” 1,2,3 степеннээх орденнарынан, “Материнская слава” 1,2,3степеннээх орденнарынан, “За доблестный труд в Великой Отечественной войне 1941-1945”
“50 лет Победы в Великой Отечественной войне 1941-1945гг”, “Маршал Советского Союза Жуков” юбилейнай мэтээллэринэн наҕараадаламмыта.
“Догдоҥо нэһилиэгин Бочуоттаах гражданина”, “Үлэ ветерана”, Бочуот Кинигэтин “Ытык Ыал” бэлиэ хаһаайына.
Ийэлээх аҕабыт 10 оҕону төрөтөн, 1 оҕону иитэн – такайан улаатыннарбыттара. Аҕабытын кытта 58 сыл бииргэ дьоллоохтук олорбуттара, 20 сиэн, 22 хос сиэн минньигэс тапталларын билбиттэрэ.
Кулун тутар 23 күнүгэр 2013 с ийэбит күн сириттэн букатыннаахтык барбыта. Подразделение где служил, воспоминания и биография.

Распечатать