Андреев Тарас Софронович

Дьаархан нэһилиэгиттэн 1941 сыллаахха маҥнайгы хомуурга ыҥырыллан Туруктаҕа диэри сатыы барыыга баар этэ биһиги эһэбит Андреев Тарас Софронович. Эйэлээх олох кэмигэр түөрт оҕотун, кэргэнин иитэр туһуттан хара сарсыардаттан им сүтүөр диэри үлэлиирэ үһү. Елена Тарасовна кэпсииринэн, олус сүрэхтээх, барыны барытын сатыыр, кыайыылаах- хотуулаах киһи эбит. Буолаҕа хортуоска, эриэппэ, сүбүөкүлэ, хаппыыста, луук, бурдук олордон кыс хаһааһын булунар эбит. Үс кыыс уонна биир уол оҕолоохтор эбит. Онтон билигин Елена Тарасовнаны кытта биһиги аҕабыт Александр ордон сылдьаллар: Евдокия кэлин, үлэһит буолан баран күн сириттэн хомолтолоохтук барбыта.
Эдэркээн бэйэлээх ыал аҕата, үлэ үөһүгэр сылдьан, таптыыр кэргэнин, оҕолорун хаалларан Ийэ дойдутун көмүскүү уоттаах сэриигэ аттаммыта. Кинини кытта бииргэ убайа уонна быраата барбыттара. Сотору Молотовка тиийбитин туһунан сурук кэлбит.
Онтон 1943 сыллаахха маннык ис хоһоонноох сурук кэлбит: “… Мин госпитальга эмтэнэ сытабын. Уҥа илиибиттэн, уҥа атахпыттан маттым. Костыль көмөтүнэн хаамар буолан эрэбин. Госпитальбыт сэрии уотун ортотугар турар…”Суругун иһигэр ойууну уонна сулус уолугар анаан ыыппыт. Ити эһэбит бүтэһик суруга эбит. Ол сэрииттэн биһиги эһэбит илиитинэн тутан- хабан сурук иһигэр уган ыыппыт ойуута кэриэс буолан бу сылдьар. Санаан көрдөххө, ол уот ортотугар турар госпиталь бүтүннүү суох буолбута буолуо. Түөрт оҕо аҕата суох тулаайах хааллахтара ол. Хомойуох иһин биир да суруга биһиэхэ ордон тиийэн кэлбэтэх. Быраата Григорий- Мындыр Киргиэлэй эмиэ сэрии хонуутугар геройдуу охтубута.
Эһэбит кэргэнэ Матрена Ивановна ол ынырыктаах сылларга күнүстэри түүннэри үлэлиирэ, иистэнэрэ. Аҥардас хаалбыт дьахтар оҕолорун киһи- хара гынарга дьулуһара. Сэрии кэмигэр, атын ханнык баҕарар тыылга хаалбыт дьахталлар курдук, барыта кыайыы иһин диэн доруобуйаларын да харыстаабакка, умса- төннө түһэллэрэ. Кыайыы кэнниттэн “ Сталин төбөлөөх” мэтээл биэрбиттэрэ. Удостоверениета билиҥҥэ диэри баар. Аҕабыт 10 саастааҕар, эбэбит ыалдьан күн сириттэн сүппүтэ.

Распечатать