Бу үөрүүлээх күҥҥэ долгуйа- аймана ахтан- санаан кэлэбит ийэбитинэн эбээбитин уонна эһээбитин Анна Васильевна, Григорий Алексеевич Игнатьевтары. Аҕыс оҕону төрөтөн, сиэн бөҕөтүн бүөбэйдээн күн сиригэр кэлбит бары иэстэрин толорон чиэстээхтик олорон ааспыт күндү дьоммутун кэриэстиибит.
1942 сыл. Григорий Игнатьев бэбиэскэ тутан алта кып кыра оҕолорун кэргэнин Анна илиитигэр хаалларан уоттаах сэриигэ барбыта. Молотовка тиийэн дизентерия ыарыыга хаптаран сэриигэ барбакка эмтэнэ хаалар. Бу ыарыыттан үгүс элбэх киһи өлөр. Григорий үтүөрбүтүн кэннэ тас Монголияҕа ыыталлар. Онно тиийэн байыаннай ыскылаакка харабылынан сулууспатын саҕалыыр. Манна кини айылҕаттан талааннаах булчут буолан куобахтаан саллааттары аһатар. Бу саллаат кырыымчык аһылыгар улахан эбии этэ. Иккис туһалаах дьарыгынан саппыкы улларыыта эбит. Иннэ гынан бииргэ сулууспалыыр дьонун барҕа махталларын ылар эбит. Араҕас муора кытыытыгар Порт- Артур диэн сиргэ Японияны кытта сэриигэ кыттар. Манна, кэлин кэпсииринэн, тоҕус араас омугу кытта сылдьар. Инньэ гынан тылларын дэлби бутуйан кэбиһэн кыайан сурук суруйбакка сылдьыбыт.
Киргиэлэй уоттаах сэрииттэн тыыннаах ордон 1946 сыл ахсынньытыгар дойдутугар кэлбитэ.
Уоттаах сэрии ити курдук Игнатьевтар дьиэ кэргэттэригэр тыылга геройдуу үлэнэн, сэриигэ хаан тохтуутунан арыалламмыта. Ол эрэн дьылҕа хаан бу ыалга үчүгэй өттүнэн эргийбитэ.. алдьархайдаах сэрииттэн эргиллибитэ аҕалара, оҕолорун барыларын киһи гыммыта ийэлэрэ. Көлөһүннэрин тоҕон аҕалсыбыт дьоллоох олохторугар, оҕолорун, сиэннэрин ортолоругар, тиһэх күннэригэр диэри сэргэ хаамсан кэлбиттэрэ. Ааналаах Киргиэлэй олохторун салҕыыр, ааттарын ааттатар 24 сиэннээхтэр, 28 хос сиэннээхтэр.
Игнатьев Борис Григорьевич ахтыытыттан:
Былыргыны былыт саппытын
Быыкаатык ахтан аһардахха,
Биэс уон сыллар түгэхтэригэр
Биир үрэх баһыгар
Бүгэн олорор ыал дьиэтин
Бэбээрэр саҥа толорор..
Арай кыра кыыстарын
Араайа диэн ааттыыллар.
Аҕыйах ыйа туолуута
Алдьархайдаах сэриигэ
Аттаммыта аҕата.
Алта оҕо иитиитин
Алыс уустук соруга
Аана ийэбит санныгар
Аҥардастыы сүгүллэн
Аймаабыта бу ыалы.
Аҕас, балыс икки кыыс
Алаһа дьиэттэн арахсан
Атын сиргэ иитиллэр
Аһыныылаах дьыалатын
Айдаанынан быһааран
Аймаммыттар харааста..
Атыттарын көрөөрү
Аас- туор аччык сылларга
Аана ийэбит барахсан
Араас үлэни толорор,
Ааттаах бортунуой аатыран
Аймах- билэ дьонноро
Айхаллыыллар, хайҕыыллар.
Распечатать