Скрябина Софья Николаевна

“Өйдөбүнньүк” кинигэттэн: 1926 с. II Дьөппөн Былдьаанатыгар төрөөбүтүм. Бииргэ төрөөбүт бэһиэбит. 1938 с. II Дьөппөн оскуолатын 4 кылааһын бүтэрбитим, ийэм ыараханнык ыалдьар буолан, оскуолаттан уурайбытым. Колхуоска 14 сааспыттан хонуу үлэтигэр үлэлээбитинэн барбытым, армияҕа барбыт эрэ дьону солбуйан, отчут-масчыт улэтигэр сылдьыбытым. Үлэбин ноһуом, саһаан таһыытыттан саҕалаабытым. 15-тээхпэр сэрии саҕаламмыта. Онно бииргэ төрөөбүт убаайым Данилов Яков Николаевич, 1922 сыллаах төрүөх, 1941 с. барбыта уонна эргиллибэтэҕэ. Ийэм 1939 с. өлбүтэ 4 оҕо тулаайах хаалбыппыт. Аҕам ыарыһах этэ. 1943 с. өлбүтэ, онтон ыла эрэйдээх олоҕум саҕаламмыта, ыарыһах балтылаах этим, ол да буоллар, үлэлиирбин тохтохпотоҕум, дьукаахтарга хаалларар этим. Балтым 1944 с. өлбүтэ. Онтон үлэ үөһүгэр түспүтүм. Мас тиэйиитэ, саһаан эрбээһинэ, хотон тутуутугар мас таһыыта. 1944 с. маай бырааһынньыгар 150 солкуобайы бириэмийэ биэрбиттэрэ, соһуйан эрэ хааллым, ньэһиилэ ытыс тыаһын ортотугар саата-саата тахсан ыллым, ылан баран үөрдэхпин аҕай, өйбүттэн хаалбат, билигин санаатахха. Наар хонуу үлэтигэр үлэлиир этим. Ыанньыкка киир дииллэр да, киирбэт этим, таҥаһым да суох этэ, хотоҥҥо кэтэр. Ынах тириитэ холуоһа наада этэ. Миэхэ ол хантан кэлиэй, сатаан тикпэт киһиэхэ? Оннук үлэлээн хамсаан-хамнаан сылдьыбытым. Мин кыргыттартан улаханнара уонна эрдэ үлэлээбит буоламмын, от охсуутугар хотуурдарын сытыылыыр этим уонна от мунньуутугар бугуллааччынан сылдьар этим, сэрии саҕана үлэлээбиппэр мэтээллээхпин, 1949 с. Сталин мэтээлинэн наҕараадаламмытым. 1948 с. Скрябин Михаил Михайловичка кэргэн тахсан, I Дьөппөҥҥө олоро кэлбитим. Ыанньыксытынан, оҕуруотчутунан 1948-1974 сс. колхуоска, “Октябрь 50 сыла” совхуоска үлэлээбитим. Кэргэним 1955 с. алтынньы 1 күнүгэр өрүскэ аварияҕа өлбүтэ. Үс оҕобун иитээри үлэҕэ барытыгар кыттыбытым. Ыанньыксыттыы сылдьан, 1960 с. Николаев Петр Степанович диэн 2 оҕолоох огдообо киһиэхэ кэргэн тахсыбытым, өссө 3 оҕоломмутум.

Распечатать