Маркова Екатерина Егоровна

Ийэбит Екатерина Егоровна Маркова – Мугудай нэһилиэгиттэн бастакы иитээччи, кини Дьокуускайга биир сыллаах педагогическай кылааһы бүтэрэн иитээччи идэтин ылбыта. 1960 сылтан 25 сыл устата олоҕун оҕону иитиигэ анаабыта. Мугудайдааҕы детсадка иитээччинэн, сэбиэдиссэйинэн үтүө суобастаахтык үлэлээбитэ. Кыра сааһыттан эрэйи эҥэрдэспит ийэбит сүрдээх холку-наҕыл, көнө-сымнаҕас майгылааҕа. Үлэһиттэригэр биир тэҥник сыһыаннаһар буолан убаастыылларын, ытыктыылларын бииргэ үлэлээбит дьонноро куруутун ахталлара. Аһа-үөлэ мэлдьи дэлэй, үчүгэй хаачыстыбалаах бородууктаны хаһаанар, малы-салы, тээбирини булар-талар, үлэтин барытын бүтэрэн-оһорон иһэр үтүө хаачыстыбалааҕын бэлиэтииллэрэ. Детсад дьиэтэ эргэ буолан, сайын аайы өрөмүөн күүһүнэн, кыраасканан оһуор-дьарҕаа көмөтүнэн бэйэтэ уруһуйдаан, сэргэхситэн биэрэрэ диэн кэпсииллэрэ.
Ийэбит Аҕа дойду Улуу сэриитин уонна үлэ бэтэрээнэ, хоту көһөрүллүү кыттыылааҕа. “Материнская слава” 1,2,3 степеннээх уордьаннарынан, “Медаль материнства” 1 степеннээх мэтээлинэн бэлиэтэммитэ. “Кыайыы 30 сыла”, “Кыайыы 50 сыла”, “Кыайыы 60 сыла” үбүлүөйүнэй мэтээллэринэн, “Аҕа дойду сэриитин 1941-1945 сс. килбиэннээх үлэтин”, “Үлэ бэтэрээнэ” мэтээллэринэн наҕараадаламмыта. Ыарахан ыарыыттан 2008 сыллаахха бэс ыйын 29 күнүгэр күн сириттэн барбыта.

Распечатать